عيد فطر سعيد

عيد فطر سعيد علينا كلنا
وكل سنة وانتم طيبين

كريم بهي

عيد ميلادي الـــ19

يوم الخميس
25/9/2008

كان عيد ميلادي التاسع عشر
اي اصبح عندي بلا فخر 19 سنة

يوم الخميس دا نزلت الجامعة عادي يعني
لكن المفاجأة
ان اجد بعض من اصدقائي اجتمعوا معايا فى جنينة الكلية
وقعدنا سويا وهزرنا وتندرنا ذكرياتنا
حسيت يومها انهم بيحبوني اوي وانى بحبهم اوى
رغم اننا كنا صايمين ومفيش لا تورتة ولا جاتوه ولا شمع
الا ان الحب الموجود كان هو اكلنا وشربنا ونورنا وفرحنا
احيانا لما الواحد يحس ان فيه حد بيحب اوي كدا
وبيفتكره ويهمه فرحته
بيحس بالقيمة والعظمة والامان

شكرا لكل اصدقائي اللى شاركونى فرحتى باليوم دا
ودي تورته كل المدونين اللى عندي

كريم بهي

الاتوبيس

ممكن جدا ان تجد معظم طوائف الشعب موجودة فى الاتوبيس ... وممكن اكثر ان تشاهد عجائب الدنيا والاخرة فى الاتوبيس

بعيدا كلامى عن حركات النشل والسرقة والمعاكسات والمضايقات والغمزات والضحكات والنظرات واللمسات المقصودة والغير للمقصودة للبنات والنساء وممكن يكون للعواجيز الامهات والجدات

لن ابيح لكم سر الفتاة التى كانت ترتدى ميكرو جيب وركبت الاتوبيس وركب بجوارها واحد ووضع يديه على ركبتها بطريقة مقززة مقرفة تدل على كبت وحرمان جارف وشهوة وقلة ادب مطلقة وعندما صرخت فى وجهه ولطمته كانت النتيجة انه اتهمها انه تراوده عن نفسه ولما رفض ضربته والناس صدقوا وشتموها ونزلت قبل المحطة التى كانت تقصدها مثلا ... لن اقول لكم عن هذه القصة

ولا احكى لكم عن النساء اللاتى قطعن شعور بعضهن من اجل كرسى .... ولا اختفاء طفل من جوار والده فى الاتوبيس لمجرد انه سهى لحظة ليدفع الاجرة .... ولا اختفاء حقائب النساء ومحفظات الرجال والرواتب والحوافظ والعلاوات

الاتوبيس هو المكان الذى يستطيع ان يضيع فيه الرجل فلوسه باسرع وقت وبادنى تعب

الاتوبيس هو المكان الذى يجد فيه الشهوانى متعته المجانية المتوفرة

لكن ما رأيكم لو كان الاتوبيس مكان الغراميات والحب او الحب من نوع خاص نوع سريع جدا قصير جدا مدته هى نفس المدة التى يقضيها الراكب فى الاتوبيس

حكاية رأيتها بعيني ....كنت راكب اتوبيس فى بنها مدينتنا المبجلة المحببة الينا ووفى اخر مقعد وانا واقف على قدمي وبجواري صديقى الواقف ايضا بدأنا نشاهد تلك اللحظات الساخنة

هو يمسك يديها وينظر لها بامعان وتانى وحب وولع وشوق وهى مبتسمة او تصتنع الكسوف والخجل

وطوال مدة الركوب حب وغراميات ولمسات واشواق واحاسيس كنت اعتقد انا وصاحبى انهما مخطوبان وكنا نعيب عليهما انهم لا ينتظران او يؤجلان الحب لبعد الاتوبيس حتى ... او يلتقيان فى نادي او كازينوا يوعيشان هذى اللحظات الساخنة

الا ان جاءت الصاعقة المدمرة بالنسبة الينا .... قامت البنت عند المحطة ( محطة القطار ) لتنزل وظل صاحبنا جالس كما هو واندهشنا ... ثم صعقنا عندما سألها ( مقلتيش اسمك ايه ؟ ) و ( هتكلمينى صح) وسأله صاحبى من باب الرخامة والتطفل او الفضول هو انت مش خطيبها قاله ( ولا اعرفها ) وظللنا طوال الطريق نضحك على الحب بتاع اليومين دول والطريقة الجديدة لتسلية الوقت فى الاتوبيس

عرفوا بعض وحبوا بعض في الاتوبيس ونزلوا من غير ما يعرفوا اسم بعض فى الاتوبيس

والبقية فى الاتوبيس تأتى

كريم بهي

ليس ككل الحب --- قصيدة
-1-
الليــلُ والقمرُ
وصورتها
علي جهاز الحاسوبْ
هاتفي المحمولُ
صوت حبيبتي
والقدرُ المكتوبْ
قدرٌ اسمه الحــب
تغتسلُ به خطايا الدنيا معي
وتتـــــــــوبْ

-2-
حين يشتعل الصباحُ
ينطفئُ جهازى الحاسوبْ
اغلق هاتفى
وأمارس لذة الاحلام بها
بعد ساعاتٍ سنتقابلُ
ويحضننى صوتها
وتنظرُ لي ... ثم تغلق عينها
وانا داخلهما
هكذا حبيبتي
أنا ملئ عينها
أنا كلُ عينها
كل ما ليْ ... كل ما فيْ
ملكي أنا لها

-3-
حبيبتي
لا تحفظ ُ فى ارقام الهواتفِ
غير رقمي
لا تعرفُ فى الاسماء ِ
سوي اسمي ..
صنعت بريدا الكترونيا
من اجلي
نافذة الشاتِ معبدُ حبها
فيه تتبتلُ وتصلي
من اجلي أنا
من اجلى

-4-
حبيبتي .. لها حبٌ
ليس ككل الحبْ
اكبر من حدود القلبْ
حبها
رسالة ٌ شفوية من الربْ
فاحفظ الرسالة يا قارئي
حبُ حبيبتي .. جنةٌ
عرضها السموات والارضْ
وحبي انا لها
جنة ٌ ما لها طول من عرضْ

مسلسلات رمضان

زى كل الناس اللى بتتفرج على مسلسلات رمضان .... انا كمان ادقيت منى وقتى جزء للمسلسلات وبصراحة رغم زحمة المسلسلات وانفجار ماسورة الدراما على شاشة التليفزيون مقدرتش اتابع الا 3 مسلسلات بس وبالعافية

الاول
نـــــاصـــــر

ملسلسل جمال عبدالناصر
بطولة مجدي كامل
وبصراحة لحد الان المسلسل بدأ يشدنى رغم ان كان رتمه بطء فى الاول خاصة فى مرحلة الطفولة والثانوي
بس دلوقت بعد دخول ناصر الجيش وظهور الشخصيات السياسة جنبه مثل السدات وزكريا محي الدين واحمد مظهر وغيرهم
بدأت الاحداث تشدنى واتمنى اكون رأي ايجابى عن المسلسل فى نهايته
وهنشوف يسرى الجندي كتب ايه
اتمنى المسلسل يبقى موضوعى ومكتوب كويس وميكررش مأساة مسلسل العندليب


الثاني
اسمهـــــان

مسلسل الفنانة اسمهان او الاميرة امال الاطرش
بطولة الفنانة السورية سولاف فواخرجي اللى بموت فيها
وطبعا المسلسل دا تقريبا بيحمل قصتين مش قصة واحدة
حياة اسمهان وفريد الاطرش
المسلسل رائع من بدايته وعجبنى اوى
واحداثه انا لسه متوقعها هتكون اش واجمل وامتع لما تبدأ اسمهان فى النضوج الفني وظهور
شخصيات كمان فى حياتها زى الصحفى محمد التابعي
وحكايتها مع المخابرات الامانية والبريطانية
وموتها قتلا وليس حادثة عربية
هنشــــــــــــووووف

الثالث
شرف فتــــح البـــاب

مسلسل الراجل الموظف المخزنجي
بطولة الفنان الكبير الرائع يحيي الفخرانى
وكمان هالة فاخر
بصراحة انا بموت فى ثمثيل الفخرانى من زمان وبعتبره قيمة فنية قبل كونه ممثل
الراجل دا بيمثل بوجهه
كل التعابير هتلاقيها فى وجهه
زى الحزن والتفكير والحسرة والضحكة والشر والطيبة وكل ماتتوقعه من تعابير
هو بيعيش الدور لدرجة انه بيدي للدور 100% من يحيي الفخرانى
كمان دور هالة فاخر جديد فى الحزن والاعتصام بالحلال والمبادئ رغم الفقر وقلة المادة
المسلسل بقي
قصته عجبانى عشان الخصخصة اللى هى نظام اقتصادى فاشل وانا طبعا كلية تجارة وفاهم
وكمان سرقة علنى لاموالنا وكمان تشريد للناس الغلابة
زى اللى حصل لشرف فتح الباب وغيره
بس ياتري الفقر اقوى من مبادئنا وديننا وايماننا
ولا الحكومة هى بتحول المجتمع لحرامي غصب عنه
ولا العيب فين
او الخلل فين بالظبط انا احترت
هنشوف المسلسل هيروح على في وفى النهاية هقولكم على رأيي
بس هو عاجبنى اوى لحد دلوقتى

****
باقى المسلسلات مش متابعها بس ساعات بيقع تحت ايدي حلقات كدا
زى قلب ميت
او الدالى
او باب الحارة

كل سنة وانتو طيبين
وياريت كل واحد يقري البوست يقولى هو بيتفرج على ايه

كريم بهي

رمضان كريم

كل عام وجميع احبائي واصدقائي
وجيرانى المدونين بخير وسلام

ورمضان كريم
كريم بهي

مبرووووووك

صديقتى واختى الغالية
ياسمين ( توتــــه ) 1

مبروووووووك النجاح فى كلية الحقوق
جامعة بنها
الفرقة الاولي
وعقبال باقى السنين

البنت دي لما بتنزل جامعة بنها
وتيجي كدا وتكلمنى كل الناس فى الجامعة يصفروا ليا وكأني واقف مع نجمة سينما
طبعا مش هي اجمل واحدة فى جامعتنا وكليتنا

البنت دي شقية اوى ومغلبة مامتها وباباها كمان
بس جميلة اوي وامورة اوى وطيبة اوى

البنت دي اجمل بنت عرفتها
والوحيدة من دون كل اللى عرفتهم حسيت معاها باحساس الاخوة
ساعات كمان بحس بانى باباها ومامتها
وكله بثوابه

مبروك ياسمينتى وكل سنة وانتى طيبة
رمضان كريم

رمضان جانا

رمضان جانا
وفرحنا به وبمسلسلاته
ومزاجنا وسجايرنا وشيشتنا
وكله تمام
اهلا بيك يا رمضان