أدوا جناحاتى للهوا والسما ..
عامل زى الطير ... اللي بيطير
وخايف ليخبط ف أوراق الشجر
حبس جنونه جوا جنحه
وعاش ف قفص اسمه البشر
ورغم انه ... كان كل عشقه
ما بين الشجر
وياما طار .. وياما خبّط .. وياما كسر
وياما وقع .. وانجرح .. وياما انكسر
وياما .. ياما طااااااار .. خبا النهار
في لمحة بصر
وما بين ليلة وليلة
طلع النهار على جرحه
شمس الجروح لهلبت له جرحه
وناس سابوا .. وناس بعدوا
وناس زهقوا من جرحه
وهما نفس الناس اللي ياما
ليهم فرد جنحه
وذاقوا الحنان اللي متغمس بفرحه
وياما داوي جروح
والكل عنده كان بيبوح
وف يوم جرحه
قولي بقي ... يا أنا لمين هتروح
الطير يا أخوانا خلاص
لملم جنحه
يا كل اللي سابوا ... وكل اللي بعدوا
الطير خلاص ماعدتش يشكى جرحه
قلبه الكبير علمه أزاي يضحك
عشان ميجرحشي
ويشد وشه ف وش الناس
قال إيه بيبتسم
ويزور بسمة ... ويزق بسمة
واهي حركة فرح بتترسم
الطير خلاص ... بيدراي وشه
بيضغط على وجعه
وآآآآآآآآآآآآآه طويلة لجوا ، جوا ، جوا
يصرخ ف وجعه
ويسحب من دمه صوت مكتوم مبيطلعش
ودمعة جوا عينه واقفة مبتنزلش
جوا عيونه جليد حزن
لو يوم طلع النهار من تاني
وعدت شمس الجروح .. هيبوح
ولو بدمعة .. دمعة واحدة
هربانة من بين الجروح
يا دنيا البشر ... أنا ، أنا
طير مجنون .... جناحاتى جنون
في طيراني سكون
ودقة قدر
يا دنيا البشر
كلام لازم أطير
من غير ما أخاف أوراق الشجر
كان لازم اخبط .. وألمس .. واكسر
وأكون أقوى كمان من القدر
وليه كل مرة ننجرح
اطلع أنا الغلطان
يمكن عشان ... دا ذنب الجنان
يمكن عشان
يمكن عشان
أنا طير .. طير
فوق ارض الذنوب
بعيش إنسان
بعيش إنسان
الطير خلاص .. جوا القفص إنسان
بين البشر ملوش مكان
الطير خلاص جوا قفصه
مستني قدره الأخير
بس
بس لو سمعتوا عنه ... ف يوم انه
مبقاش يطير
خدوا جناحاته ... أدوها للهوا والسما
أصله زمان كان بيحب يطير
ويفرد جناحاته فى حضن الهوا
وقلب .. قلب السما
أدوا جناحاتى للهوا والسما
*
5 comments:
اقرأ نص اتفاقية منع تهريب السلاح لغزة
وادعوا الله ان يثبت مصر في عدم التوقيع عليها
السيد الأستاذ/ كريم بهى
صاحب مدونة / كريم بهى
اعتذر عن الخروج من موضوع التدوينة لقد أرسلت لك الجزء الثاني من الاستمارة (7صفحات)، أرجو منك إرسال رسالة توضح أن الجزء قد وصلك وأنه ليس هناك مشكلة في إرساله أحالت وصله لسيادتك .
تحياتي وتقديري
شيماء إسماعيل
باحثة بالماجستير- كلية الآداب جامعة القاهرة.
السيد الأستاذ/ كريم بهى
صاحب مدونة / كريم بهى
اعتذر عن الخروج من موضوع التدوينة لقد أرسلت لك الجزء الثالث من الاستمارة (7صفحات)، أرجو منك إرسال رسالة توضح أن الجزء قد وصلك وأنه ليس هناك مشكلة في إرساله أحالت وصله لسيادتك .
تحياتي وتقديري
شيماء إسماعيل
باحثة بالماجستير- كلية الآداب جامعة القاهرة.
انا بشبه على القصيده دي :D
شوفتها فين قبل كده ؟؟ شوفتها فين قبل كده ؟؟
منار "روللي" اللي ورتهالي :)
Post a Comment