البوست دا فكرة مش عارف إن كانت جديدة ولا قديمة
المهم أنا بحاول اعمل حاجة جديدة شوية
كل واحد يدخل حجرته معانا وبكدا هندخل جوا شخصياتنا كمان
وبدعي كل أصحابنا وصحابتنا المدونين لو عجبتهم الفكرة ينفذوها في مدوانتهم
بس ياريت لو يقولولى عشان أعرف أنى نجحت يعني
وأتمنى البوست يعجبكم
كريم بهي
عندما تدخل من باب حجرتي تجد علي يمينك سرير لطيف
لكن عادة مش مرتب أو تقدر تقول طول ما أنا موجود في الحجرة يعني
وعليه بعض الجرائد اليومية زى الأخبار – المساء – الأهرام أو أسبوعية
زى أخبار الأدب أو القاهرة أو مجلات زى المصور وأحيانا إخبار النجوم أو الكواكب أحيانا أو مجلة يقولى عليها واحد من صحابي أو صحباتى أو مجلة منشور فيها خبر يهمني
وطبعا السرير كدا بقى طبيخ لكن ربنا يكون في عون ماما ست الحبايب بتعانى بصراحة
سيبك من السرير دلوقت واتجه قصاده هتلاقى مكتب
أيوا هو مكتبي
ودا عليه بقي من خيرات ربنا كتير أوى
هتلاقى علي اليمين كتب زى الخالدون مائة أنيس منصور أو هذه الشجرة العقاد أو البؤساء هوجو أو حديث النهر سوريال عبد الملك أو أعمال شكسبير ودواوين شعر لنزار حبيب قلبي وخاصة ديوان حبيبتي وغادة السمان ومحمود درويش واحمد عبدالمعطى حجازي ونازك الملائكة أو كتب عن الدبلوماسية أو عن التاريخ أو عن الأدب
وطبعا هتلاقى شوية كتيبات صغيرة لأجاثا كريستي أو روبرت اونيل وخاصة المزيف وكمان مسرحية لانطون تشيكوف الروسي وقول معايا كمان مائدة أفلاطون وكتاب بحبه أوى اسمه غادة رشيد لبدر الدين علي الجارم والفلاح لعبد الرحمن الشرقاوي وكتب ثانية بس مش فاكرها دلوقت
وطبعا دا غير اللي في مكتبة بابا لكن دايما بحطهم بتنسيق شديد جدا والا مش هاعرف أذاكر وياما صحابي قالولى أحطهم في المكتبة لكن دي غية يبقوا أدام عيني كدا
والأدراج مليانة أوراق وكتب جامعية محاسبة على إدارة أعمال على رياضة بحتة ومالية على اقتصاد وبنوك ونقود
لكن في كتابين بحبهم أوى الأول المدير الذكي ل د / احمد سيد مصطفي
والثاني سلوكية البائع والمشتري ل د/ محمد بكرى وعبد الله جماعة
دا غير بقي كشاكيل المحاضرات والأوراق إللى بذاكر فيها
وفيه في الأدراج اشعارى المطبوعة والجرائد اللي نشرت فيها
والدرج الكبير فيه شهادات تقديري
الطالب المثالي على المدرسة ثم الإدارة ثم المحافظة ( الثانوية )
وشهادات تقدير الاتحاد العام لطلاب مدارس الجمهورية ( الثانوية )
وشهادات لانى موهوب في الشعر
وميداليات اتحاد طلاب الجمهورية
وصور وذكريات وكتاب اسمي فيه
وحاجات ثانية كدا وشوية أوراق
نسيت أقولكم انه على المكتب عادة بتلاقوا نظارتي والموبايل والراديو الجميل الصغنتوت بتاعي عشان اسمع إذاعة الاغانى والشرق الأوسط وf.m
وأقلام بأنواع مختلفة وممكن حاجات ثانية مش لازم تعرفوها
ارفع عنينك شويتين هتلاقى على الحيطان شوية صور فوتوغرافية ليا
واحدة لما كنت في مبنى الاتحاد العام أمام مسرح البالون بالعجوزة أيام الوزير احمد جمال الدين موسي إللى شوفته هناك وعلى فكرة الراجل دا كان محترم جدا
والثانية لما كنت في القرية الفرعونية
والثالثة لما كنت في متحف السادات جوا القرية الفرعونية
والرابعة في مبنى الاتحاد العام برده لما كنت بمتحن الطالب المثالي على مستوي الجمهورية تحت لواء الوزير يسرى الجمل الله يسامحه وأنا في الثانوية
وصورة كمان
بس أنا اللي راسمها لعبد الحليم حافظ العندليب
بصراحة أنا لما بدأت رسمها ما كنش قصدي ارسمه بس طلعت شبه أوى فكملتها وكتبت عليها نعم يا حبيبي نعم
وكل اصحابى ما كنوش مصدقين إللى أنا اللي راسمها
وطبعا هتلاقوا كراسي وقليل من التحف وباب البلكونة
وفيه كمان في الحيطان زراير الكهربا
ودلوقت هاضعط على زرار النور
تك
الدنيا بقت ضلمة
تصبحوا على خير
ملحوظة ( حذفت بعض الحاجات إللى حسيت ملهاش لازمة وعشان البوست ميبقاش طويل
كريم بهي
22 comments:
كريم الرائع
مرة اخرى تجذبنى الى اعماق عالمك المحيط
عالمك الذى تحيا فيه
فكره رائعه
تجعل القارئ يتعرف عليك اكثر كانسان
منك ككاتب او شاعر
عشقت حجرتك وتفاصيلها التى تشابهه حجرتى كثيرا
عدا موضوع المكتب هذا
لانى لاارى المكتب شئ محبذ وجوده فى غرفة النوم
الكتب فى حجرتى موضوعه ارضا
وعلى ماكينه التدريبات الرياضيه
وعلى الكومود بجوار السرير
وبداخل الكمود
كل الود والمشاعر يا كريم
انا كمان نزلت بوست جديد
وممكن تلحق اول تعليق دلوقت
سلام مؤقت
يا صديق الروح
والله هي الفكرة جميلة, فلو مدونتي شخصية اوللتعرف علي اصدقاء جدد لنفذت فكرتك
فكرة جامدة جدا ومن المكان اللى الانسان بيعيش بتعرف شويه عن دهاليز شخصيته باعتبار ان الاوضه بتاعت الانسان دا بيقضى فيها وقت كبير من حياته فيها
هحاول اجرب فكرتك ان شاء الله
تأخرت عليك كثيرا يا كريم
معلش
أصلى كنت مشغول جدا
و الحقيقه كنت بقول فى نفسى
دة مش هيكمل فى التدوين
و هينشر أشعاره عليها فقط و يسيب الهدف الاساسى ، فى رأيى من التدوين،و هو الفضفضه و البوح و الراحه
كل الحاجات دى عشتها معاك فى البوست ده
و تانى مره متحذفش حاجه
طلاما الكلام مهم بالنسبالك و قلت اللى انت عاوزه
هتلاقى حد يسمعك و يقرالك بغض النظر طويل أو قصير
المهم أنه طالع من قلبك
فأكيد هيلاقى قلبك يحسهو اللى يلاقى البوست كبير
يبقى البوست مش ليه و لا هيحسه
و ما يستهلش يقراه
و كمان حاجه
مش معنى التعليقات الكتير انه أتقرا
فى عوامل كتير تشدنى للمدونه
زى شكلها الجميل و القتباسات الجميله فى البانر
شكرا يا كريم
حاول تكلمنى
أصلى بجد مشغول
تأخرت عليك كثيرا يا كريم
معلش
أصلى كنت مشغول جدا
و الحقيقه كنت بقول فى نفسى
دة مش هيكمل فى التدوين
و هينشر أشعاره عليها فقط و يسيب الهدف الاساسى ، فى رأيى من التدوين،و هو الفضفضه و البوح و الراحه
كل الحاجات دى عشتها معاك فى البوست ده
و تانى مره متحذفش حاجه
طلاما الكلام مهم بالنسبالك و قلت اللى انت عاوزه
هتلاقى حد يسمعك و يقرالك بغض النظر طويل أو قصير
المهم أنه طالع من قلبك
فأكيد هيلاقى قلبك يحسهو اللى يلاقى البوست كبير
يبقى البوست مش ليه و لا هيحسه
و ما يستهلش يقراه
و كمان حاجه
مش معنى التعليقات الكتير انه أتقرا
فى عوامل كتير تشدنى للمدونه
زى شكلها الجميل و القتباسات الجميله فى البانر
شكرا يا كريم
حاول تكلمنى
أصلى بجد مشغول
كريم
اخى العزيز جدا
اية اخبارك النهرضة يارب تكون بالف خير
حلو اوى فكرة البوست دة يا كريم
اد اية حجرة كل واحد فينا ممكن تتكلم عنا فى اوقات كتير
وياريت بجد كل واحد يكتب بوست عن حجرتة وهو بيشوفها ازاى
وانا اول واحدة هبتدى بالفكرة لانها عجبانى
وهنزل بوست اوصف فيها شكل حجرتى من وجهة نظرى الشخصية جدا
بس ادعيلى ان النت يتصلح عندى علشان احل التاج بتاع
rain man
وبعد كدة انزل البوست الجديد
دومت يا اخى العزيز
الغاليه شيرين
صديقة الروح
بالنسبة للمكتب الموجود في الحجرة دا لابد لاني بذاكر لوقت طويل وبحاول اقرا بين اوقات المذاكرة عشان كدا لابد انه يلازمنى ظروف خاصة يعني
وميرسي انك عشقت حجرتى وكل مادا بنقرب بعض وشخصياتنا بتتقارب اوى
سلام مؤقت يا صديقة الروح
شرفتينى طبعا
نسرين
نورتى المدونة
وبصراحة مش فاهم اوى تعليقك
يعنى ايه مدونتى شخصية
عموما نورتى المدونة ومستنيكى تانى
***************************************
lonlysmily
اهلا بيك وهاكون سعيد لو جربت فكرتي
وميرسى لتشريفك
وكلامك صح الصح
شكرا
فاوست
الاستاذ طه عبدالمنعم
اولا احب ابارك لنفسي لعودتك بعد طول غياب
مع انك كنت الزائر الاول لمدونتى
وانك اول واحد التقى به شخصيا من اصدقاء التدوين والادب والكتابة
فانت حق الصديق وحق الاخ
اما عن كلامك احب اقول
يا راجل كنت متوقع انى مش هكمل تدوين عشان بكتب اشعاري طيب ما الاشعار بوح وفضفضة انت ناسى ان اللى زينا بكتب بوح وفضفضة حتى ولو كان فى شكل شعر او كتابة بشكل خاص
انا مش معاك يا طه فى الحتة دى
وزى ما بتقول ان اللى يعتبر البوست طويل ميستحقش يقراه برده اللى ميبحش يقرا كتاباتنا واشعارنا ميستحقش يقراها
انا معاك ان التدوين فضفضة لكن اوعدك انى هاكمل واكون من افضل المدونين العرب
ان شاء الله
وميرسى يا طه على مرورك الفاوستى دا
دومت بخير وسلام
نوراي
الجميلة اللى زى العسل
انا كويس النهارده يا نوراي
وانا كنت مستنى كومنتك اول كومنت وهو فى نظرى اول كومنت
وانا سعيد جدا انى البوست عجبك
وميرسى انك هتلبى الفكرة وتنفيذيها وانا لابد اكون اول تعليق على البوست دا
ان شاء الله
نورت يا احللى نوراي فى الدنيا
وهتوحشينى للكومنت الجاي
مش هاقول باي
كريم - شوف يا حبيبى
أصل فبه ناس لاداعى لذكر أسمها
مستخدمه المدونات للشهره
و نشر شعرها فقط
لا أعترض على الشعر أو نشره
لكن يضايقنى جدا
أقتصار المدونه على هذا فقط
انت عارف يعنى إيه تدوين
دى دنيا تانيه
طب انا بنشر قصصى عليها
بس بفضضفض و أتكلم و أصرخ
بحط صور و أغانى و مقاطع من كتب
التدوين عالم تانى أخر
لا أحب التضييق عليه
بالشكل الذى وصفته لك
شوف الردود
قرائك يريدون من خلال التدوين ان يتعرفوا عليك
أكثر من كونك شاعر أو كاتب
أرجو أن تكون فهمتنى يا شاعر يا جميل
كريم
خمنت ان المكتب للمذاكره والله
بس انا قصدت اقولك ان ده الفرق بس ما بين حجرتينا
لو انت شلت المكتب
حجرتك هتبقى حجرتى
انا لو حطيت فى اودتى مكتب
هتبقى حجرتى هى حجرتك
:)
فاوست الغالى ابن الناس الغاليين
طبعا انت عارف اد ايه انا مبسوط برجوعك تانى عندى
وعاوز اقولك عن الناس اللى بيحاولوا يشتهروا بالشعر والادب من خلال المدونات هم احرار
كل فاوست بيشوف نفسه فى المرايا زى ما هو عاوز يشوف نفسه ودى طبعا ميخلنيش اقول انه اعمى مثلا او مبيشوفش
الحكاية ان انا عاوز الناس يشفونى ازاي
اما عن موضوع الشهرة اظن لسه بدرى عليا شوية ولا ايه ما انت عارف انة الليل والشوارع على رأي انغام
انا بحفر فى الصخر عشان اكتب ولو الحروف الاولى من اسمي
عموما التدوين بوح وفضفضة سواء كان كلام عادى سواء كانت شعر قصص روايات حواديت
يا فاوست اختلافهم رحمة
شرفتنى والله يا جميل
اصل كان نفسى اتكلم
شيري
بجد بحس ان المدونة لها روح لما بشوفك عندي دا حقيقي
اما عن حكاية المكتب دا
انا ممكم اولع فيه عادي ولا ان يكون بينا شئ مختلف ابدا
وميرسى على كلماتك الرقيقة فى المدونة عندك
صدقينى انتى يا شيري
شئ نفيس ونادر اوى فى ا جوهر البشرية
متقلقيش من حكاية المكتب دى
تحياتي
يا رفيقة الروح
انا قريت البوست دا الصبح فعلشان كدا هقولك صباح الخير
سعيدة اني في اول زيارة ليك قدرت اعرف لمحة سريعه عنك
وايه كل الشهادات دي والجوايز دي اللهم لاحسد
أتمنى المرة اللي جاية اني اقرا اشعارك
green eyes
تحياتى الخضراء لعينيك
وزيارتك الجميلة لمدونتي
وعلى فكرة اشعاري
موجودة على المدونة فى السايد البار
قصائدى على المدونة
تحياتي
اوضتك فكرتني باوضتي شوية
انا اهو قاعدة على الكمبيوتر الى جنب السرير بتاعي
وورايا حيطة..مليانة لوحات..من شخابيطي
:)
ولع النور بقى خلينا نعرف نخرج
فكرة جميلة اوي .....وبالذات لأني ليا جو خاص في غرفتي ....يمكن نتشارك في حاجات كتير زي حالة السرير وكتب العقاد واجاثا كريستي وتعليق الصور فوق المكتب لكني ماعتقدش اني ممكن احتفظ بكتب انيس منصور او غادة السمان في غرفة نومي
مدونة جميلة
تحياتي
هههههههههه
انا شكلي يا كريم خربت الدنيا
مش عارفه كأني حطيت تعليق لمدونه تانيه بس هون
:D
معلش
بتصير باحسن العائلات
بس هادا التعليق اكيد للبوست هادا
هي فكره رائعة فعلا وان شاء الله اطبقها عندي في المدونة بس والله خايفه ابدأ فيه وما اخلص عشان غرف البنات بتكون غريبه وكلها اشياء طالعه نازله
انا اسفه لو التعليق لقيت تعليق غريب ما الو دخل بالموضوع يا ريت تحزفوا ويمكن ما تلاقي واكون عامله الكارثة بمكان تاني :D
دمت بود
روري
فكرة رائعة فعلا , احتمال ابقى اعملها بس انا مشكلتى ان مش كل حياتى جوه اوضتى زى حضرتك وف نفس الوقت انا ماليش عامل كبير فى ترتيبها وتنظيمها , هما كل لما يحسوا إن اوضة مزحومة باى حاجة فى الشقة يجيبوها على اوضتى وانا اضطر اتأقلم عليها وخلاص هههههههه
dr roufy
انا ليا الشرف ان حجرتي تشبه حجرتك
وطالما ان هناك شخابيط كتيرة
ليه مابنشوفش منها حاجة
ميرسى لمرورك جدا نورتي
*****************************
سمكة
انتى اول سمكة تبحر فى مدونتى
واول مرة تزورينى ودا يسعدنى جدا
اما بالنسبة لجو الحجرة الخاصة بك
وكتب العقاد واجاثا كريستي
وكتب انيس منصور وغادة السمان
فدى عملية اتجاهات وميول المهم يبقى فيه كتب وكلهم رائعون طبعا
وانتى اروع بالتأكيد
شرفتينى يا سمكة
واتمنى اقرا حجرتك على مدونتك قريب
روري
انت تشرفي فى اى وقت
وبالنسبة لحجرة البنات دا شئ يرجعلك
وان كان ممكن تقولى حاجات عادية يعنى اصلها بصراحة حرية
فى الاول والاخر
تحياتى ليكي
***************************************
زى الهوا
اولا انا بموت فى اغنية عبدالحليم زى الهوا
وخاصة انها من تلحين بليغ
المهم نورت يا جميل
وبالنسبة لعد تحكمك فى حجرتك فدا عملية وقت مش اكتر بكرة تبقى مستقل
وكمان اكيد هناك لمسات فيها لوجودك فيها
حتى ولو كانت لمستك انك موجود فيها
وحياتنا مش فى الحجرة وبس ولكن فيها ما لا يراها الاخرون
وبلاش حكاية حضرتك والنبى
شرفت ونورت
Post a Comment