تحيا مصر وبحبك اوي

انبارح كنت قاعد اتفرح على الماتش كنت قاعد ساكت طول الماتش كنت خايف وكل فرصة بتضيع بتعصبنى وتخلينى اتألم كنت مركذ اوى وقلبي كان هيقف عن النبض وعمال ادعي يارب ما تضيع تعبهم يارب والنبي تكملها علي خير يارب خليك حليفهم ووفقهم يارب
كنت بدعي زي كل المصريين ما كانو بيدعوا ويقوا يارب
يارب الفوز لمصر يارب الكاس يارب عشان مصر
المصريين اللى قاعدين على القهاوي والكافتيريات رافعين علم مصر لا بسين علم مصر راسمين علم مصر دفيانين بعلم مصر من البرد
كلهم كانوا قاعدين بيتفرجوا علي الماتش انا والـ75 مليون مصري من كل انحاء مصر على القهاوي والشوارع والبيوت والمقاهي والاحياء من كل مكان فى الوطن العربي من كل حته فى العالم من كل حي عربى مصري
الكل كان بيتفرج على الماتش ومصر
على عظمة وقوة وروح المصري
علي المجد والعزة وشرف المصري
على البطولة والرجولة ونصر المصري
علي الحب والود والانتماء المصري
على الايد الواحدة والاتحاد المصري
الكل كان بيتفرج وقاعد فى القهاوى محمد ويا عيسي عبدالله مع بطرس احمد جنب جرجس
الكل كان قاعد بيقول يارب يارب
كل فرصة تضيع ينتفضوا وهيموتوا من القلق والخوف والحب عمالين يدعوا
الكورة رايحة جاية فى الملعب وعيونا معاها اااااااااااااااااه
يارب جون جون بقي
وشوية
لقينا محمد زيدان بيجري
قرب من الجون بالكورة
بقت هجمة
وقع تحت المدافع الكاميرونى سونج
قام ووقع وقام
دفع الكورة برجله
وكانه كان بيقولها يالا بقي روحي
راحت الكورة
وعيونا معاها
لقينا ابوتريكة جاي
خطوتين بالكورة والتالتة
من تحت حارس المرمي جوا الجون
دخلت الجون
دخلت الجون
صرخنا بعلو صوتنا وقمنا
جووووون
محمد فى حضن عيسي
وعبدالله في قلب جرجس
واحمد وبطرس عيونهم دمعت
وانا
انا
كنت قاعد ولقتنى بعلو صوتي بقول
جوووووووووووووووووووووووووووووووووووووووووووووووووووووووون
واتنطت واجري وفرحان اوى جون جون جون
كنت فرحان فرحان وعرفت ليه كنت ساكت وقلقان وبـالم عرفت انى بحب مصر اوى اوى اوى
تحيا مصر تحيا مصر وبحبك بعمري يا مصر
كاننا عبرنا القنال من جديد او فتح عسكري او ثورة يوليو تانى او نصر حرب 73 بقي عام 2008
الناس فى القهاوي والشوارع حتى الصباح
رجال اطفال نساء امهات بنات
كبار صغار
طلبة عمال فلاحين وزرا ورجال اعمال
مسلمين مسيحيين
الفرحة فى كل مكان فى الاهرامات عند النيل فى المساجد فى الكنائس فى الشوارع فى البيوت فى السيارات فى كل حي وحارة وشارع وكل قلب وعين
الفرحة كان كبيرة اوى والاعلام مرفوعة والناس بتقول تحيا مصر
تحيا مصر تحيا مصر
وانا انا بقول تحيا مصر تحيا مصر
التليفزيون كا بيقول تحيا مصر الراديو الكومبيوتر الموبايل الساعة الخواتم السلاسل الحظاظات فى ايد الشباب النظارات والهدوم والاض والسماء والليل والنجوم كل حاجة كانت بتقول تحيا مصر
حتي الشمس طلعت على الناس فى الشوارع بتقول تحيا مصر
الناس اللى بايتين فى شوارع مصر والمطار اللى جايين من اسوان واسكندرية وبور سعيد والسلوم
جايين ينتظروا الفريق القومى المنتخب المصري ويقولوا تحيا مصر
وانا نسيت الحزن نسيت اليأس نسيت الهزيمة نسيت اللى فات
نويت لا بدأت اكتب واكتب واكتب وافكر وابنى واعمر خلاص روح جديدة اتولدت فيا انبارح مع روح مصر
ياااااااااااااااااااااااه
دا انتى حلوة اوى يا مصر
حلوة اوى
يا بلدي
يا عمري
وانا مصري
وابن مصري
وانتى بلدي
انتى حبيبتي
انتى انتى يا ام الدنيا
بحبك اوى

مبروك لمصر للنصر
للمنتخب الوطنى بالفوز بكأس الامم الافريقية للمرة السادسة والمرة الثانية على التوالي
مبروك لكل المصريين وكل العرب
مبروك لغزة وبغداد
مبروك لكل فريق عربى كانت فى البطولة وطلع
مبروك ليا انا
وليكم اهل التدوين
مبروك لكل اصحابي الواقعيين والمدونيين
مبروك ليكي
يا مصر
وبحبك اوى

انتظروا البوست القادم

التاج

تحيا مصر

كريم بهي؛